રશિયા-યુક્રેન યુદ્ધ વચ્ચે પુતિનને ઝેર આપીને મારવાનું કાવતરું! અંગત સ્ટાફના 1000 કર્મચારીઓને બરતરફ કરાયા

યુક્રેન પર હુમલા બાદ રશિયાના રાષ્ટ્રપતિ વ્લાદિમીર પુતિન ‘બેચેન’ છે. અહેવાલો અનુસાર, સંભવિત પરમાણુ હુમલાના ડરથી તેમણે તેના પરિવારને એક રહસ્યમય ભૂગર્ભ શહેરમાં છુપાવી દીધો છે. પુતિનનો ડર એટલો વધી ગયો છે કે તેણે તેના 1000 અંગત કર્મચારીઓને કાઢી મૂક્યા છે કારણ કે તેને લાગે છે કે તેઓ તેને ઝેર આપીને મારી શકે છે. એક અહેવાલમાં કહેવામાં આવ્યું છે કે પુતિને ડરના કારણે તેમના સેંકડો અંગત સ્ટાફની બદલી કરી છે.

ડેલીસ્ટાર સમાચાર અનુસાર, આમાં પુતિનના રસોઈયા, સચિવો, લોન્ડ્રી કામદારો અને અંગરક્ષકોનો સમાવેશ થાય છે. રશિયા-યુક્રેન વચ્ચે છેલ્લા 26 દિવસથી યુદ્ધ ચાલી રહ્યું છે અને યુક્રેનની રાજધાની કિવ હજુ પણ ઝેલેન્સકી સરકારના નિયંત્રણમાં છે. અત્યાર સુધીમાં પાંચ રશિયન જનરલ અને હજારો સૈનિકો માર્યા ગયા છે. એક ફ્રેન્ચ એજન્ટે દાવો કર્યો છે કે ક્રેમલિનના આંતરિક લોકો બળવા કરીને પુતિનને સત્તા પરથી હટાવી શકે છે. આનો એક રસ્તો ‘રશિયન રાષ્ટ્રપતિની હત્યા’ પણ હોઈ શકે છે.

સમાચાર અનુસાર, વરિષ્ઠ રશિયન રાજકીય વ્યક્તિઓએ જાહેરમાં પુતિનના નજીકના લોકોને તેમની હત્યા કરવા માટે ઉશ્કેર્યા છે. તેથી પુતિનની આશંકા પાયાવિહોણી નથી. સાઉથ કેરોલિનાના સેનેટર લિન્ડસે ગ્રેહામે ટ્વિટ કરીને પુતિનની હત્યા માટે હાકલ કરી હતી. તેણે કહ્યું, ‘આ બધું ખતમ કરવાનો એકમાત્ર રસ્તો એ છે કે કોઈ વ્યક્તિ પુતિનને બહાર ફેંકી દે. તમે તમારા દેશ માટે, વિશ્વ માટે આ કરશો.

ફ્રાન્સના એક ગુપ્તચર અધિકારીએ દાવો કર્યો હતો કે જો પુતિનની હત્યા કરવામાં આવે તો ઝેર એક સંભવિત રસ્તો હોઈ શકે છે. રશિયન સરકાર તેના દુશ્મનો સામે ઝેરનો ઉપયોગ કરવા માટે જાણીતી છે. ફ્રેન્ચ એજન્ટે ડેઈલી બીસ્ટને કહ્યું કે આ પ્રયાસો ક્રેમલિનની અંદરથી જ થઈ શકે છે. તેમણે કહ્યું કે રશિયન ગુપ્તચર જ એકમાત્ર એવી એજન્સી છે જે ઝેરનો ઉપયોગ કરે છે.

તમને જણાવી દઈએ કે આ મહિનાની શરૂઆતમાં પણ અમેરિકી સાંસદે પુતિનની હત્યાની વાત કરી હતી. તેમના આ નિવેદનના કારણે તેમને માત્ર રશિયાથી જ નહીં પરંતુ તેમની જ પાર્ટી તરફથી પણ ઠપકો આપવામાં આવ્યો હતો.