રશિયા-યુક્રેનના યુદ્ધ વચ્ચે સોનાના ભાવ 53 હજારને પાર તો ચાંદી 70 હજાર નજીક, ગોલ્ડ 56 હજાર પર પહોંચવાની શક્યતા
છેલ્લા ઘણા દિવસોથી રશિયા અને યુક્રેન વચ્ચે ચાલી રહેલા યુદ્ધની અસર ભારતમાં સોના-ચાંદીના ભાવ પર પણ પડી છે. દેશમાં આજે સોના અને ચાંદીના ભાવમાં મોટો ઉછાળો આવ્યો છે. જ્યારે દસ ગ્રામ સોનાનો ભાવ 53 હજારને પાર કરી ગયો છે તો એક કિલો ચાંદીનો ભાવ 70 હજારની નજીક પહોંચી ગયો છે. સોનાની કિંમતમાં લગભગ 1500 રૂપિયાનો વધારો થયો છે, જ્યારે ચાંદી લગભગ 2,000 રૂપિયા મોંઘી થઈ છે.
સોના અને ચાંદીની કિંમત જાહેર કરતી વેબસાઈટ ibjarates.com અનુસાર, 999 શુદ્ધતાનું 10 ગ્રામ સોનું આજે 53234 રૂપિયામાં વેચાઈ રહ્યું છે. 995 શુદ્ધતાના સોનાની કિંમત 53021 રૂપિયા છે. તે જ સમયે, જો આપણે 916 શુદ્ધતાના સોનાની વાત કરીએ, તો તેની કિંમત 48762 રૂપિયા થઈ ગઈ છે. બીજી તરફ 750 શુદ્ધતાનું સોનું 39926 રૂપિયામાં ઉપલબ્ધ છે. આ ઉપરાંત 585 શુદ્ધતાના સોનાની કિંમતમાં પણ વધારો થયો છે. આજે તેની કિંમત 31142 રૂપિયા પર પહોંચી ગઈ છે. બીજી તરફ 999 શુદ્ધતાની એક કિલો ચાંદીની કિંમત વધીને 69920 રૂપિયા થઈ ગઈ છે.
ગયા સપ્તાહની સરખામણીમાં સોના અને ચાંદીના ભાવમાં કેટલો વધારો થયો?
સોના અને ચાંદીના ભાવ દરરોજ બે વખત જાહેર કરવામાં આવે છે. એકવાર સવારે અને બીજી વાર સાંજે. ગત શુક્રવારની સરખામણીએ આજે 999 શુદ્ધતાના સોનામાં 1450 રૂપિયાનો વધારો થયો છે, જ્યારે 995 શુદ્ધતાનું સોનું આજે 1444 રૂપિયા મોંઘું થયું છે. 916 શુદ્ધતાનું સોનું આજે 1328 રૂપિયા મોંઘું થયું છે, જ્યારે 750 શુદ્ધતાના સોનાના ભાવમાં 1088 રૂપિયાનો વધારો થયો છે. આ સિવાય 585 શુદ્ધતાનું સોનું 848 રૂપિયા મોંઘુ થયું છે. તે જ સમયે, જો આપણે એક કિલો ચાંદીની કિંમત વિશે વાત કરીએ, તો આજે તેની કિંમત પાછલા ટ્રેડિંગ દિવસની તુલનામાં 1989 રૂપિયા વધી છે.
યુદ્ધનો તણાવ રહ્યો તો સોનું રૂ. 56,000 પણ થઈ શકે છે
અમદાવાદની AB જ્વેલ્સના ડિરેક્ટર મનોજ સોનીએ જણાવ્યું હતું કે રશિયા અને યુક્રેન વચ્ચે ચાલતા યુદ્ધને પગલે વૈશ્વિક બજારમાં સોનું સતત વધી રહ્યું છે. એની અસરરૂપે સ્થાનિક બજારમાં પણ સોનાના ભાવ સતત વધી રહ્યા છે. જો બંને દેશો વચ્ચે તણાવની સ્થિતિ યથાવત્ રહેશે તો આગામી દિવસોમાં સોનું રૂ. 56,000 પ્રતિ 10 ગ્રામના સ્તરે પહોંચી શકે છે. જોકે હાલ ભારતીય બજારમાં જ્વેલરીની ખરીદીમાં ઓફ સીઝન ગણાય એટલે આ સમયે ઘરેણાંની ખરીદી બહુ રહેતી નથી. પરિસ્થિતિ સામાન્ય બનશે એટલે સોનામાં ફરી ઘટાડો થશે.
ગુજરાતમાં ગયા સપ્તાહે સોનાના ભાવ
તારીખ | 10 ગ્રામ સોનાનો ભાવ |
5 માર્ચ | 52,200-54,200 |
4 માર્ચ | 52,100-53,400 |
3 માર્ચ | 52,000-53,200 |
2 માર્ચ | 51,900-52,900 |
1 માર્ચ | 52,800-53,000 |