રશિયા અને યુક્રેન વચ્ચેનું યુદ્ધ ખતરનાક વળાંક લઈ રહ્યું છે. રશિયન સેના યુક્રેનની રાજધાની કિવ સહિત અનેક મોટા શહેરો અને સૈન્ય મથકો પર સતત હુમલા કરી રહી છે. યુક્રેન પણ આ હુમલાઓનો જવાબ આપી રહ્યું છે. આ યુદ્ધ દરમિયાન ઘણા લોકોએ જીવ ગુમાવ્યા છે અને સંપત્તિને ભારે નુકસાન થયું છે. અનેક લોકો બેઘર બન્યા છે. લોકો તેમનાથી અલગ થઈ ગયા છે. યુદ્ધના કારણે થયેલા નુકસાનને ભરપાઈ કરવામાં હવે ઘણો સમય લાગશે. રશિયાના હુમલામાં યુક્રેનને ભારે નુકસાન થયું છે
યુદ્ધ રોકવા માટે બંને દેશો વચ્ચે વાટાઘાટો પણ થઈ હતી, પરંતુ કોઈ ફાયદો થયો નહોતો. હવે આ દરમિયાન, રશિયન સેનાએ યુક્રેનમાં હુમલા દરમિયાન વિશ્વના સૌથી મોટા વિમાનને પણ નષ્ટ કરી દીધું છે. આ વિમાનની કિંમત કરોડોમાં હતી અને તેને બનાવવામાં ઘણો સમય લાગ્યો હતો. આવો જાણીએ દુનિયાના સૌથી મોટા એરક્રાફ્ટ વિશે.
એક મીડિયા રિપોર્ટ અનુસાર એન્ટોનોવ An-225 એરક્રાફ્ટ વિશ્વનું સૌથી મોટું એરક્રાફ્ટ હતું. રશિયન સેનાએ હોસ્ટોમલ એરફિલ્ડ પર કબજો કરી લીધો છે અને પ્લેનને નષ્ટ કરી દીધું છે. યુક્રેનમાં તેને “મરિયા” કહેવામાં આવતું હતું જેનો અર્થ થાય છે સ્વપ્ન. આ વિમાન છેલ્લા 30 વર્ષથી તેની સેવા આપી રહ્યું હતું.
તમને જાણીને નવાઈ લાગશે કે આ પ્લેનને બનાવવામાં 5 વર્ષ લાગ્યા હતા અને તેની કુલ કિંમત 22 કરોડ રૂપિયા હતી. આ પ્લેનનું સંચાલન કરતી યુક્રેનની રાજ્ય સંરક્ષણ કંપની યુક્રોબોરોનપ્રોમે કહ્યું છે કે તેને ફરીથી બનાવવામાં ઘણો સમય અને પૈસા લાગશે. જો તેને રશિયા દ્વારા વળતર આપવામાં આવે, તો તે ફરીથી બનાવી શકાય છે. જો કે આવું થતું દેખાતું નથી.
રશિયન સૈન્ય દ્વારા વિમાનને નષ્ટ કરવામાં આવતા કંપનીને ભારે નુકસાન થયું હતું. કંપનીના જણાવ્યા અનુસાર, તે હવે રશિયા પાસેથી સંપૂર્ણ કિંમત મેળવવાનો પ્રયાસ કરશે. કંપનીએ કહ્યું કે રશિયાએ જાણીજોઈને યુક્રેનના ઉડ્ડયનને નષ્ટ કર્યું જેથી એરલાઈનને અસર થઈ શકે. એન્ટોનોવ એરલાઈન્સના ડાયરેક્ટરના કહેવા પ્રમાણે, અમે પ્લેનનું એન્જીન કાઢીને રિપેર કરવા માટે આપ્યું હતું, પરંતુ પ્લેન હવે ફરી ઉડી શકે તેમ નથી.
યુક્રેનના વિદેશ મંત્રી દિમિત્રો કુલેબાએ વિમાનના વિનાશ માટે રશિયાની આકરી ટીકા કરી છે. તેમણે કહ્યું છે કે આ વિમાને દેશના મુશ્કેલ સમયમાં ઘણો સાથ આપ્યો. તેણે વર્ષ 2010માં હૈતીમાં આવેલા ગંભીર ભૂકંપમાં પણ લોકોને મદદ કરી હતી અને કોરોનાના સમયગાળા દરમિયાન જરૂરિયાતમંદ લોકો સુધી પહોંચવામાં પણ ઘણી મદદ કરી હતી.