78 વર્ષીય અમિતાભને પગમાં ફ્રેક્ચર થયું, એ છતાં ‘KBC’ના સ્પેશિયલ નવરાત્રિ એપિસોડનું શૂટિંગ કર્યું
અમિતાભ બચ્ચનનો જન્મ 11 ઓક્ટોબર, ૧૯૪૨ થયો હતો. તે એક ભારતીય ફિલ્મ અભિનેતા અને પ્રખ્યાત હિન્દી સાહિત્યકાર હરિવંશરાય બચ્ચનના પુત્ર છે. તેમણે 1970 ના દાયકા દરમિયાન ખૂબ જ લોકપ્રિયતા મેળવી અને ત્યારથી ભારતીય સિનેમાના ઇતિહાસમાં એક અગ્રણી વ્યક્તિ બની ગયા. અમિતાભે પોતાની કારકિર્દીમાં અનેક એવોર્ડ જીત્યા છે, જેમાં દાદાસાહેબ ફાળકે એવોર્ડ, ત્રણ રાષ્ટ્રીય ફિલ્મ પુરસ્કારો અને બાર ફિલ્મફેર પુરસ્કારોનો સમાવેશ થાય છે. તેમણે શ્રેષ્ઠ અભિનેતા માટે સૌથી વધુ ફિલ્મફેર એવોર્ડ મેળવવાનો રેકોર્ડ બનાવ્યો છે.
અભિનય ઉપરાંત, બચ્ચન એક પ્લેબેક સિંગર, ફિલ્મ નિર્માતા, ટીવી પ્રસ્તુતકર્તા અને ભારતીય સંસદના ચૂંટાયેલા સભ્ય તરીકે 1984 થી 1987 સુધી કામ કર્યું હતું. તેઓ ઘણા વર્ષોથી લોકપ્રિય ભારતીય ટીવી શો “કૌન બનેગા કરોડપતિ” માં હોસ્ટની ભૂમિકા ભજવે છે. આ શોમાં તેમના દ્વારા કરવામાં આવેલ ‘દેવિયો ઔર સજ્જનો’ નું સંબોધન દરેક માટે ખુબ જ લોકપ્રિય છે. અત્યારે તેમની ઉમર 78 વર્ષ છે. 78 વર્ષીય અમિતાભ બચ્ચન હાલમાં ‘કૌન બનેગા કરોડપતિ’ને કારણે ચર્ચામાં છે. બિગ બીને પગમાં ફ્રેક્ચર થયું હોવા છતાં તેમણે ‘KBC’નું શૂટિંગ બંધ કર્યું નથી. અમિતાભે આ અંગેની વાત કરી હતી.
પગની આંગળીમાં ફ્રેક્ચર થયું
અમિતાભે તસવીરો શેર કરીને પગની ઈજા અંગે વાત કરી હતી. તેમણે કહ્યું હતું, ‘પગની તૂટેલી આંગળીમાં ખુબ દુખાવો થાય છે, પરંતુ હું પ્લાસ્ટર કરાવીશ નહીં અને શૂટિંગ પણ ચાલુ જ રાખીશ. મારી આ સમસ્યા ચાર-પાંચ અઠવાડિયામાં દૂર થઈ જશે.’
નવરાત્રિનો એપિસોડ શૂટ કર્યો
અમિતાભ બચ્ચન આ એપિસોડમાં જેકેટ તથા કુર્તા-પાયજામામાં જોવા મળે છે. તેમણે નવરાત્રિના એપિસોડનું શૂટિંગ કર્યું છે. તેમણે આંગળીને આરામ મળે તે રીતના શૂઝ પહેર્યાં છે.
કામની વાતો જાણો
અમિતાભ બચ્ચનના કામની વાત કરીએ, તો તેઓ નાગ અશ્વિનની ફિલ્મમાં દીપિકા પાદુકોણ તથા પ્રભાસ સાથે જોવા મળશે. આ ફિલ્મ માટે તેઓ 21 કરોડની ફી લેશે તેવી ચર્ચા છે. આ ઉપરાંત તેઓ ‘મેડે’, ‘ઝુંડ’, ‘બ્રહ્માસ્ત્ર’, ‘ગુડબાય’ તથા ‘ધ ઇન્ટર્ન’માં જોવા મળશે. છેલ્લે તેમની ફિલ્મ ‘ચેહરે’ રિલીઝ થઈ હતી.
અમિતાભ બચ્ચને અભિનેત્રી જયા ભાદુરી સાથે લગ્ન કર્યા છે અને તેમને બે બાળકો શ્વેતા નંદા અને અભિષેક બચ્ચન છે. અભિષેક બચ્ચન જાણીતા અભિનેતા છે, જેમણે ભૂતપૂર્વ વિશ્વસુંદરી અને અભિનેત્રી એશ્વર્યા રાય સાથે લગ્ન કર્યા છે. અત્યારે બંનેને એક પુત્રી છે, જેનું નામ આરાધ્ય બચ્ચન છે.
