જયા બચ્ચને બિગ બીના આઉટફિટને લઈને કહી આ વાત, નારાજ અભિનેતાએ વાત કરવાની જ ના પાડી દીધી
ટેલિવિઝનના પ્રખ્યાત ક્વિઝ રિયાલિટી શો કૌન બનેગા કરોડપતિની 13મી સિઝન આ દિવસોમાં દર્શકોનું ખૂબ જ મનોરંજન કરી રહી છે. શોમાં આવતા તમામ સ્પર્ધકો અને ખાસ મહેમાનો શોના હોસ્ટ અભિનેતા અમિતાભ બચ્ચન સાથે ખૂબ જ મસ્તી કરતા જોવા મળે છે. તો દર્શકોને પણ બિગ બીની આ ખાસ અંદાજ પસંદ આવી રહ્યો છે. આ શો શરૂઆતથી જ દર્શકોનો પ્રિય રિયાલિટી શો રહ્યો છે. છેલ્લા 21 વર્ષથી આ શો દર્શકોનું ખૂબ જ મનોરંજન કરી રહ્યો છે.
શોએ તેની 21 વર્ષની લાંબી સફરને આવરી લેતા હવે વધુ એક ઉપલબ્ધી હાંસલ કરી છે. આ શોએ તેના 1000 એપિસોડ પૂરા કર્યા છે. આવી સ્થિતિમાં, અમિતાભ બચ્ચનની પુત્રી અને તેની પૌત્રી આ ખાસ પ્રસંગની ઉજવણી કરવા માટે શોમાં પહોંચી હતી. આ દરમિયાન શોમાં પહોંચેલી શ્વેતા બચ્ચન અને નવ્યા નવેલી નંદાએ બિગ બી સાથે શોમાં ખૂબ જ મસ્તી કરી હતી.
આ દરમિયાન શોમાં એક ફની મોમેન્ટ પણ જોવા મળી હતી. વાત જાણે એમ હતી કે અભિનેતા અમિતાભ બચ્ચન શોમાં તેમની પત્ની અને અભિનેત્રી જયા બચ્ચનથી નારાજ થયા હતા. એટલું જ નહીં, આ દરમિયાન તેણે એમ પણ કહ્યું કે તે તેની સાથે ક્યારેય વાત નહીં કરે. વાસ્તવમાં, એવું બન્યું કે શો દરમિયાન કેબીસી 13 પર બિગ બીની તેમના આઉટફિટ માટે જયાએ ટીકા કરી. જયાના આ વર્તન પછી અભિનેતાએ જયા બચ્ચન સાથે વાત ન કરવાનું કહ્યું.
સોની એન્ટરટેઈનમેન્ટ ટેલિવિઝન દ્વારા યુટ્યુબ પર 1000મા એપિસોડની વિડિયો ક્લિપ શેર કરવામાં આવી છે. આ ક્લિપમાં અમિતાભ બચ્ચનની પુત્રી શ્વેતા બચ્ચન અને પૌત્રી નવ્યા નવેલી નંદા પણ જોવા મળી હતી. ઉપરાંત, જયા બચ્ચન એક વીડિયો કોલ દ્વારા એપિસોડનો ભાગ બનતી જોવા મળી હતી. વીડિયોમાં નવ્યા નવેલી નંદા અમિતાભ બચ્ચનને કહે છે, “તમે સૂટમાં ખૂબ જ સારા દેખાઈ રહ્યા છો. નહીંતર મેં હંમેશા તમને ઘરે ગાઉનમાં જોયા છે. પોતાની પૌત્રીની આ વાત સાંભળીને અમિતાભ હસી પડ્યા.
આ અંગે શ્વેતા જણાવે છે કે જ્યારે તેઓ બધા ઘરે KBC 13 જુએ છે, ત્યારે જયા અમિતાભના આઉટફિટ પર સૌથી વધુ ટિપ્પણી કરે છે. આ પછી નવ્યાએ આગળ કહ્યું કે, “તેને તમારા કેટલાક રંગો પસંદ નથી. તો તે સીધું જ કહે છે કે અરે આજે એટલો સારો નથી લાગતો.” આ પછી અમિતાભે જયાને પૂછ્યું, “જયા, નવ્યા શું કહી રહી છે કે તને મારા પર ઘણા રંગો પસંદ નથી?”
આના પર જયાએ જવાબ આપ્યો કે, તમને મેં જાતે કહ્યું છે. કોઈ તો ખબર નહીં લાલ અને બ્રાઉન કલરના હોય છે. અને કોઈ એક વિચિત્ર વાયોલેટ કલરનો સૂટ પહેર્યો છે. જ્યારે જયાએ આ સૂટ વિશે વાત કરી હતી. ત્યારે તે સ્ક્રીન પર બતાવવામાં આવે છે. જેના પર અમિતાભે વિચિત્ર ચહેરો બનાવ્યો. આ પછી અમિતાભ જયાને પૂછે છે કે ‘હું જે વાયોલેટ સૂટ પહેરું છું તે મને સારો નથી લાગતો?’ આના પર જયાએ કહ્યું, “તે તમને સારું નથી લાગતું.”
જયાના જવાબ સાંભળીને અમિતાભે કહ્યું, હું તમારી સાથે વાત નહીં કરું. આ સાંભળીને બધા જોરથી હસી પડ્યા. તો જયાએ કહ્યું, “સારી વાત છે.” નોંધનીય છે કે અમિતાભ બચ્ચન વર્ષ 2000થી કૌન બનેગા કરોડપતિ ક્વિઝ શોને હોસ્ટ કરી રહ્યા છે. શોના 1000 એપિસોડ પૂરા થવા પર, અભિનેતા તેની 21 વર્ષની સફર જોઈને ભાવુક થઈ ગયા
