પેન્ડોરા પેપર્સમાં હવે બોલિવૂડ અને બિઝનેસમેનના નામ આવ્યા સામે, કરોડોના કૌંભાંડની શંકા

ભારત રત્ન સચિન તેંડુલકર, અનિલ અંબાણી, નીરવ મોદી, કિરણ મઝુમદાર શો આ પેન્ડોરા પેપર્સમાં આવેલા લગભગ 500 ભારતીયોમાંના કેટલાક લોકપ્રિય નામો છે. વિદેશમાં જમા નાણાં જાહેર કરતા આ દસ્તાવેજો અનુસાર, વિશ્વભરના ધનિકોએ લાખો કરોડો રૂપિયાની કર ચોરી કરી અને આ નાણાં ટેક્સ હેવન તરીકે ઓળખાતા દેશો અને કંપનીઓમાં જમા કરાવ્યા. ઈન્ટરનેશનલ કોન્સોર્ટિયમ ઓફ ઈન્વેસ્ટિગેટિવ જર્નાલિસ્ટ્સ (આઈસીઆઈજે) દ્વારા બહાર પાડવામાં આવેલા આ રિપોર્ટમાં, આ ભારતીય હસ્તિઓ દ્વારા વિદેશી ખાતા અને કંપનીઓમાં જમા અને સંપત્તિના ખુલાસા કરવામાં આવ્યા છે-

3 ટેરાબાઇટ્સનો કુલ ડેટા, 1.19 કરોડ ફાઇલો અને 750,000 ફોટા જાહેર કરવામાં આવ્યા છે

1970 થી લઈને મોટાભાગે 1996 થી 2020 સુધીના દસ્તાવેજો સામેલ છે

91 દેશોના 330 રાજકારણીઓના નામ જાહેર કરવામાં આવ્યા હતા, જેમાંથી 35 નેતાઓ તેમના દેશના ઉચ્ચતમ હોદ્દા પર પહોંચી ગયા છે અથવા હજુ પણ છે.

130 અબજપતિઓ પણ આ યાદીમાં સામેલ છે

સચિન તેંડુલકર: કંપનીને વેચીને જમા કરી રકમ

ક્રિકેટ મેગાસ્ટાર ભારતરત્ન સચિન તેંડુલકર, તેની પત્ની અંજલી અને સસરા આનંદ મહેતાના નામ સામે આવ્યા છે. 2016 માં, બ્રિટિશ વર્જિન આઇલેન્ડ્સ (BVI) સ્થિત કંપની વેચી દેવામાં આવી હતી અને વિદેશમાં નાણાં જમા કરાવવાનો દાવો કર્યો હતો. જોકે, તેંડુલકરના વકીલે આ વેચાણને કાયદાકીય રીતે માન્ય ગણાવ્યું છે.

અનિલ અંબાણી: 9,965 કરોડની 18 કંપનીઓ

9,965 કરોડની વિદેશમાં કાર્યરત 18 કંપનીઓની લીસ્ટ સામે આવી છે. આમ તો અનિલ અંબાણીએ ગયા વર્ષે લંડનની એક બેંકમાં કહ્યું હતું કે તેમની નેટવર્થ શૂન્ય છે, પરંતુ તેમની પાસે ચીનની ત્રણ સરકારી બેન્કોના નાણાં પણ બાકી છે.

કિરણ મઝુમદાર શોના પતિનું નામ સામે આવ્યું

7,360 કરોડ રૂપિયાની કંપની બાયોકોનના પ્રમોટર કિરણના પતિ અને બ્રિટિશ નાગરિક જ્હોન શો પર આરોપ છે કે ઇનસાઇડર ટ્રેડિંગ માટે સેબી દ્વારા પ્રતિબંધિત કુણાલ અશોક કશ્યપની આગેવાની હેઠળ ટ્રસ્ટ બનાવ્યું. બીજી બાજુ, કંપનીએ દાવો કર્યો છે કે સમગ્ર પ્રક્રિયા માન્ય છે.

નીરવ મોદી: ભાગતા પહેલા બહેન પાસે બનાવ્યું ટ્રસ્ટ

તેમની બહેન પૂર્વી મોદીએ ટ્રસ્ટની રચના કરી હતી. આ ટ્રસ્ટ નીરવ મોદીના દેશ છોડીને ભાગી જવાના એક મહિના પહેલા જ બનાવવામાં આવ્યુ હતુ.

સમીર થાપર: નોન-પ્રમોટર બન્યા, શેર પણ લીધા

પંજાબ સ્થિત ઉદ્યોગસાહસિક સમીર થાપર નોન-પ્રમોટર તરીકે BVI આધારિત JCT લિમિટેડમાં ભાગીદાર છે. મસ્ક હોલ્ડિંગ્સ લિ.ના 50 હજાર શેર પણ છે.

નીરા રાડિયા: 1.86 કરોડની ઘડિયાળ ખરીદી

લોબિંગ અને ભ્રષ્ટાચારની આરોપી રેહલી નીરા આ વખતે BVI માં લગભગ 12 કંપનીઓમાં ભાગીદારી અને વ્યવહાર કરતી જોવા મળી હતી. આમાંથી એક કંપની દ્વારા, દુબઈમાંથી 1.86 કરોડની ઘડિયાળ પણ ખરીદી હતી. તેમની સેવા આપતા ટ્રાયડન્ટ ટ્રસ્ટ કંપનીએ તેમને ક્લાયન્ટનો દરજ્જો ‘ડુ નોટ ડિસ્ટર્બ’ કેટેગરી આપ્યો છે. તેનો અર્થ એ કે કોઈપણ વ્યવહાર માટે તેની સાથે સીધો સંપર્ક કરવાની મનાઈ હતી.

જેકી શ્રોફ: વર્જિન આઇલેન્ડમાં ટ્રસ્ટ દ્વારા બનાવેલ કંપની

જેકી શ્રોફને ન્યૂઝીલેન્ડમાં તેની સાસુ ક્લાઉડિયા દત્તાએ બનાવેલા ટ્રસ્ટમાંથી સૌથી વધુ લાભ મળ્યો. ટ્રસ્ટનું સ્વિસ બેંકમાં ખાતું છે અને વર્જિન આઇલેન્ડમાં ઓફશોર કંપની પણ છે. જેકીએ તેમાં પૈસા પણ મૂક્યા. પુત્ર જય અને પુત્રી કૃષ્ણને લાભ મળ્યો.

કેપ્ટન સતીશ શર્મા: ચૂંટણીપત્રોમાં કોઈ ખુલાસો નથી

ગાંધી પરિવારના નજીકના ભૂતપૂર્વ પેટ્રોલિયમ મંત્રી સ્વર્ગીય કેપ્ટન સતીશ શર્મા અનેક વિદેશી કંપનીઓ, ટ્રસ્ટો અને મિલકતો સાથે સંકળાયેલા હોવાનો દાવો કરવામાં આવ્યો છે. તેની પત્ની, બાળકો અને પૌત્રો સહિત પરિવારના 10 સભ્યો જેન જેગર્સ ટ્રસ્ટના લાભાર્થી છે. તેમણે ચૂંટણીના ઉમેદવારીપત્રમાં આનો ક્યારેય ખુલાસો કર્યો નથી.

અજય કેરકર: કોક્સ એન્ડ કિંગ્સ પછી નવો ઘટસ્ફોટ

અજય કેરકર, જે અગાઉ છેતરપિંડીના આરોપમાં પકડાયા હતા અને કોક્સ એન્ડ કિંગ્સના માલિક હતા, બ્રિટિશ વર્જિન આઇલેન્ડમાં બે કંપનીના માલિક છે. અન્ય છ કંપનીઓ સાથે પણ સંબંધો છે.

હાલની જાહેરાત કેટલી મોટી છે તે સ્પષ્ટ નથી, પરંતુ નિષ્ણાતો તેને 320 લાખ કરોડ અમેરિકી ડોલર સુધી ધારી રહ્યા છે.
ICIJ ના જણાવ્યા અનુસાર, વિશ્વભરના હજારો ધનવાન લોકોએ ટેક્સ બચાવવા અને તેમના પૈસા અને સંપત્તિ છુપાવવા માટે ઓફશોર (વિદેશ) કંપનીઓ અને ટ્રસ્ટનો ઉપયોગ કર્યો છે.

ઉદાહરણ તરીકે, એક વ્યક્તિ ભારતમાં મિલકતની ખરીદીનો માલિક બન્યો, પરંતુ તેણે આ ઘણી કંપનીઓ પાસેથી ખરીદી કરી, જેના કારણે તેનું નામ સામે આવ્યું નહીં.

આ કંપનીઓ ટેક્સ હેવન તરીકે ઓળખાતા દેશોમાં આધારિત છે, જ્યાં ખાસ નિયમો છે.
ઓફશોર ટ્રસ્ટ સામાન્ય રીતે ભારતમાં માન્ય છે, પરંતુ તેમાં ભાગ લેવાનો હેતુ શું છે તે મહત્વનું છે. તેથી ભાગીદારી દરમિયાન ઘણી ગુપ્તતા જાળવવામાં આવી હતી, જે લીકમાં પ્રકાશમાં આવી હતી.